ഓർമ്മയിലെ ഉമ്മാമ
==========================
അലികത്തും,കമ്മലും, കൊമ്പനും ലോലാകും
മൊഞ്ചിൽ പണിതൊരു മുറിത്തിലാട്ടവും* ,
കസവിന്റെ തട്ടവും പതക്കവും* പിന്നെ
കഴുത്തില് തിളങ്ങുന്ന മാലയും
ചാർത്തിക്കൊണ്ടുമ്മറ കസേരയില്
ഇരിക്കായാണെന്നുമ്മ
വെളുക്കെ ചിരിച്ചും ,തലയും കുലുക്കീറ്റൊരുപാട്
കഥകള് പറഞ്ഞോരുമ്മ
വറുതിയുടെ കാലത്ത് കഞ്ഞീലെ വറ്റിനായ്
തപ്പി നടന്നതും വെള്ളം കുടിച്ചതും
പപ്പടം കാച്ചാന് എണ്ണയില്ലാഞ്ഞടുപ്പില് ചുട്ടതും
തറവാട്ടു വീട്ടിലെ അരി കുത്ത് ജോലിയും
കൂലിയായ് കിട്ടിയ ഇരുന്നാഴി അരി കൊണ്ട്
അഞ്ചാളെ പോറ്റുവാന് കണ്ണീര് കുടിച്ചതും
തുന്നി പിടിപ്പിച്ച വസ്ത്രങ്ങളിട്ടോണ്ട്
പെരുന്നാള് കഴിച്ചതും
ചന്തക്ക് പോകുവാന് കരഞ്ഞൊരു പോക്കറെ
കോന്തല കെട്ടിലെ ആറണ കാണാഞ്ഞു
നിറ കണ്ണാലെ അടിച്ചു പറഞ്ഞതും..
ഒരു ഇരുന്നൂറു വട്ടം കേട്ടിരുന്നു
എല്ലാം പറഞ്ഞിറ്റിങ്ങനെ പ്രാര്ത്ഥിക്കും
കൊജ രാജാവായ തമ്പുരാനേ
ഇന്നീ തന്ന നി'അ മത്തി*ന്നാലെ
നാളത്തെ സ്വർഗ്ഗം തടഞ്ഞിടല്ലേ
കൊശുവും കിബുറും വന്നു പോയെങ്കില്
സദയം പൊറുക്കണേ തമ്പുരാനേ
അഷ്റഫ് എസ്സം വരിക്കോളി
28/11/12
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ