എന്റെ നാട്
----------------------------
മരവുരിയും മെതിയടിയും
ഒരുക്കി വെക്കുക
കാലമതിവേഗ മുരുളുന്നു പിന്നോട്ട്
സതി വരും അയിത്തം വരും
അരമുണ്ടുടുത്ത വാല്യക്കാരും
മുല മറക്കാത്ത പെണ്ണുങ്ങളും
വികസന കാഴ്ചകളാവാം

മുലക്കരമടക്കാനൊരു
ലോണെടുക്കുക
അല്ലങ്കിൽ.............ഹാ കഷ്ട്ടം

ഗോമൂത്രം ഔഷധവും
ചാണകം പുണ്യവും ആവുമ്പോൾ
കോണകവും പൂണൂലും
അലങ്കാരമാവും

നാലുവരിപ്പാതയിൽ ഒരുവരിയിൽ
പുലയന് നടക്കാം
പിന്നാമ്പുറ വാതിലിന്റെ
താഴിളക്കി വെക്കുക
അടുത്ത ജന്മത്തിലെങ്കിലും
ബ്രാഹ്മണനായി ജനിക്കാൻ കൊതിക്കുക.

ഓണമിനി ഓര്മയിലിരിക്കട്ടെ
പകരം വാമന ജയന്തിയാവാം
ജമ്മിയുടെ പത്തായം നിറക്കാൻ
എല്ലു മുറിയെ പണിയെടുക്കുക

ജനഗണ മറന്നേക്കുക
വന്ദേ മാതരം ചൊല്ലിപ്പടിക്കുക
ത്രിവർണ പതാകയുടെ മുകളിൽ
കാവിക്കൊടി കണ്ടാൽ കണ്ണടക്കുക

ഹാ.. എന്റെ നാട്‌
തമസ്സിലേക്കല്ലോ യാത്ര
മാനിഷാദ ചൊല്ലാൻ
ഒരു മുനി ജനിച്ചെങ്കിൽ..!

അഷ്‌റഫ് എസ്സം വരിക്കോളി

അധ്യാപക ദിനം

അധ്യാപക ദിനം
--------------------------------
അധ്യാപകരെ ഞങ്ങൾ
ഇരട്ട പേരിട്ടു വിളിക്കുമായിരുന്നു
ടീച്ചറെയും മാഷിനെയും ചേർത്ത്
ഗോസിപ്പുകൾ പറയുമായിരുന്നു
പക്ഷെ
ഉമ്മയെ പോലെ സ്നേഹിക്കുകയും
ബാപ്പയെപ്പോലെ ബഹുമാനിക്കുകയും
ഗുരുവായി വന്ദിക്കുകയും ചെയ്യുമായിരുന്നു

നിലത്തെഴുത്തിൽ നിന്നും
നിലാവിൽ എഴുതാനുള്ള
ഉയരത്തിൽ വിദ്യ എത്തിയപ്പോൾ
പ്രേമ ലേഖനം വെച്ച് നീട്ടുന്ന
ശിഷ്യന് മുന്നിൽ
തല കുനിച്ചു നിൽക്കുകയാണ്
ടീച്ചറമ്മ
പള്ളികൂടങ്ങളും മദ്യ ഷാപ്പും
തമ്മിലുള്ള അകലം കുറയുമ്പോൾ
മനുഷ്യനും മൃഗവും തമ്മിൽ
വാലിന്റെ കുറവ് മാത്രം.
നന്മയുടെ നാലക്ഷരം പഠിപ്പിച്ചു
ഗുരുനാഥൻ മാർക്ക്
പ്രാർത്ഥനകൾ.

അഷറഫ് എസ്സം വരിക്കോളി