കുട്ടിക്കാലം

കുട്ടിക്കാലം 
---------------------------
തവളകൾ കരയുന്ന പാടവരമ്പിലൂ -
ടക്കര പോകണം പള്ളി കൂടാൻ
കാലിൽ ചെരുപ്പില്ല കയ്യിൽ കുടയില്ല 
മാറ്റി ഉടുക്കുവാൻ നിക്കറില്ല

മഴയൊന്നു കനത്താൽ ഉറ്റുറ്റി വീഴുന്ന
ജലധാരയാണന്നകത്തളത്തിൽ
ഉമ്മ വിളമ്പിയ കഞ്ഞി വെള്ളത്തിൽ
എണ്ണി യെടുക്കുന്ന വറ്റുമാത്രം

ഉണ്ണി പിറന്നാലും മംഗളം വന്നാലും
പെരുന്നാൾ കോടി ഒന്നു മാത്രം
ഇട്ട ചെരുപ്പിന്റെ വാറുപൊട്ടുന്നേരം
വാറുകൾ മാത്രം മാറിവരും

നേരം പുലർന്നാൽ ഉമിക്കരി തേടി
ഇറയായ ഇറയല്ലാം തപ്പിനോക്കും
മണ്ണെണ്ണ കത്തുന്ന പാട്ട വിളക്കിന്റെ
കരിയാലെ മൂക്കും കറുത്തിരിക്കും

നന്ദുവും നാണുവും നന്ദിനി ടീച്ചറും
നന്മതൻ പൂവായ് മനസ്സിലുണ്ട്
ചീരോ പറങ്കിയും ഉപ്പ് മാവിനും
കാലം മറക്കാത്ത രുചിയുമുണ്ട്

അഷ്‌റഫ്‌ എസ്സം വരിക്കോളി

അറവു മാട്

അറവു മാട്
-----------------------
കുതിപ്പും കിതപ്പും ഒരുന്നാൾ നിലക്കും
നാക്കില വെട്ടി കിടത്തും
നാല് ശകലങ്ങളായ് പകുത്ത് 
ഉത്തരത്തിൽ തൂക്കും
ചെറു കഷണങ്ങളായ് ത്രാസിലും
അവിടുന്നു എരിവു പുരട്ടി ചട്ടിയിലും
ദുഷ്ട്ടന്റെ വയറ്റിലും നീ എത്തും
ഇപ്പോൾ
തോലോട് ചേർന്ന് വെച്ചിരിക്കുന്ന
തലയാണ്
നിന്റെ ഐഡന്റിറ്റി
അത് നിന്നോടുള്ള സ്നേഹമല്ല
അറവുകാരന്റെ തന്ത്രം മാത്രം

അഷ്‌റഫ്‌ എസ്സം വരിക്കോളി