എസ്സം .ബ്ലോഗ്‌

തലമുറ ..................
------------------------------
അമ്മിയും അമ്മയു മപ്പുറത്ത്
മിക്സിയും മമ്മിയാണകത്തളത്ത്
തറയും പനയും പഴഞ്ചനായി
ആപ്പിളും കേറ്റും കുഞ്ഞെഴുത്ത്

പൊട്ടിയ സ്ലേറ്റിലെ അക്ഷര കൂട്ടങ്ങൾ
ടാബ്ലറ്റിൻ നെഞ്ചിൽ മിന്നി നില്പൂ
പേനയും പെൻസിലുമിരുന്നിടത്ത്
ടച്ചും മൌസും ചാരി നില്പൂ

കഞ്ഞിയും പയറും മറന്നു കുഞ്ഞ്
ന്യൂഡിൽസും, ബ്രെഡും പഥ്യമാക്കി
തലയിൽ തലോടുന്ന അമ്മൂമയെ
ഈറോടെ നോക്കുന്ന പേരമക്കൾ

രാമ നാമങ്ങൾ ജപിച്ച സന്ധ്യ
വിഡ്ഢിവെളിച്ചങ്ങൾ സ്വന്തമാക്കി
ഈണമാം ഗാനങ്ങൾ കെട്ടിടത്ത്
റോക്കുകൾ ബാൻഡുകൾ കയ്യടക്കി

വളരുന്ന ലോകത്ത് പായുന്നു മര്‍ത്യന്‍
ഉടുമുണ്ടഴിഞ്ഞത് കണ്ടിടാതെ
തലയിലെ തൊപ്പിയിൽ നക്ഷത്രം ചൂടുവാൻ
ഒറ്റിക്കൊടുക്കുന്നു മുലപ്പാലിനെ

ലക്ഷം മുടക്കി കോടികൾ കൊയ്യുവാൻ
ബിരുദം വരിക്കുന്ന തലമുറകൾ..
വിദ്യകൾ നേടി പാമരനാകാതെ
ജ്ഞാനിയായ് മാനിയായ് തീർന്നുവെങ്കിൽ !

അഷ്‌റഫ്‌ എസ്സം വരിക്കോളി