തളിരിനോട് പറയാൻ ....

തളിരിനോട് പറയാൻ 
================
പോക്കു വെയിലേറ്റ 
നരച്ച വഴിയിലാണ് 
നിന്റെ ജന്മം 

നീ പിഴയാണ് പോലും
വിശപ്പടക്കിയവന്റെ
എച്ചിലിൽ നിന്നും
തെറിച്ചു വീണ വിത്ത്

തോട്ടകാരന്റെ
സേചനമില്ലാത്ത
വേലികൾ കാവലില്ലാത്ത
തെരുവിന്റെ കാലൊച്ചകൾ
കേട്ടുണരേണ്ടവൾ

നിറമില്ലാത്ത നിന്റെ
ഇതളുകൾ നോക്കി
വർഗ്ഗബോധം മറന്ന
റോസാ പൂക്കളും
ഊറി ചിരിച്ചേക്കാം

കാമ കരിവണ്ടുകൾ
കാത്തിരിപ്പുണ്ട് 
നിന്നിളം മേനിക്കായ്
ജാതി ചോദിക്കില്ലവർ
പൂതി തീരും വരെ ..

എങ്കിലും നീ അറിയുക
നീരുണങ്ങാത്ത
മനസ്സുകളിനിയുമുണ്ടീഭൂമിയിൽ
ഒരുക്കി വെക്കുന്നുണ്ടവർ
നിനക്കായ്
കരുണ വറ്റാത്തൊരു ഹൃദയം....

അഷ്‌റഫ്‌ എസ്സം വരിക്കോളി