എസ്സം .ബ്ലോഗ്‌

മടക്കയാത്ര ...................
--------------------------------------
പ്രവാസം സമ്മാനിച്ച കഷണ്ടി തലയും
മാത്രകൾ കാവലിരിക്കുന്ന സ്ഥിര രോഗങ്ങളും
മടക്കയാത്രയിൽ  കൂട്ടിനുണ്ട്

നന്ദിയുടെ സ്നേഹ വാക്കുകൾക്ക്
മനം കൊതികുമ്പോൾ കേൾക്കാം
ആക്ഷേപത്തിന്റെ തീപോള്ളുന്ന
ചോദ്യങ്ങൾ "നീ എന്തുണ്ടാക്കി .........?"

എഴുതി വെക്കപ്പെടാത്ത രക്ഷണങ്ങൾ
അവകാശമായ് പകുത്തെടുത്തവർ
കരുണ വറ്റിയ വാക്കുകളെ
ചങ്കിൽ കുത്തിയിറക്കുമ്പോൾ
പുത്തനുടുപ്പിടാത്ത പെരുന്നാളും
വിമാനക്കൂലി മിച്ചം പിടിക്കാൻ
മാറ്റി വെക്കപെട്ട യാത്രകളും
പിന്തിച്ച് ചെമ്പിച്ച മോഹങ്ങളും
വിരഹത്തിൽ വെന്ത യൗവനവും
കളിയാക്കി ചിരിക്കുന്നുണ്ടാവും

ഹരിച്ചും ഗുണിച്ചും കിട്ടുന്ന
കണക്കുകളിൽ ഉത്തരങ്ങിളില്ലാത്ത
ചോദ്യങ്ങൾ ബാക്കി
നീ എന്തുണ്ടാക്കി .............?

നന്മകൾ വാരി കോരി തന്ന മരുഭൂമിയോടും
ആവശ്യങ്ങളുടെ തിരയിളക്കത്തിൽ
ഒലിച്ചു പോയ കാലത്തോടും
പരാതിയില്ല

മനസ്സിൽ തികട്ടി വരുന്ന
ഒരു ചോദ്യം മാത്രം ....
ബാക്കിയുള്ളോരരനാഴിക
സ്വസ്ഥമായോന്നു നെടുവീർപ്പിടാൻ
ഇനിയെന്ത്  ..?

അഷ്‌റഫ്‌ എസ്സം വരിക്കോളി