ആരാമം ..

ആരാമം .................
--------------------------------
വാടിയ തളിരുകളാരമങ്ങളിൽ
കരുണയും തേടിയിരിപ്പുണ്ട്
വളവും നനയും കള്ളിചെടികൾ
ആർത്തിയിലൂറ്റിയെടുക്കുന്നു
കാവൽ നിൽകും വേലികളകിലം

വിളകൾ തിന്നു കൊഴുക്കുന്നു
കുടയും ചൂടി വരുന്നുണ്ടൊരുവൻ
ദയ യുടെ വാക്ക് നനച്ചീടാൻ
ഇലകളിലല്പം നനയും വെച്ച്
കോടികൾ മുക്കി നടന്നീടും
പാമ്പുകൾ തേളുകളാരാമത്തിൽ
സ്വൈര വിഹാരം ചെയ്യുന്നു
മരമറിയാതെ ചില്ലയിലെന്നും
പാമ്പിൻ പൂവ് പിറക്കുന്നു
ഉറ്റവരുടയവർ ആരാമങ്ങളിൽ
പാഴ്ച്ചെടിയായ് മരിക്കുന്നു
രുധിരം പൊടിയും കഥപറയുന്നുണ്ട-
ച്ഛനില്ലാ പൈതങ്ങൾ
ലഹരികൾ നുരയും പുഴയുണ്ടിവിടെ
കണ്ണീരുപ്പായ് ഒഴുകുന്നു
നോവുകൾ പൂവുകളായ് വിരിയുമ്പോൾ
ആരാമത്തിൽ പൊന്നോണം
കോലം കെട്ടി എഴുന്നെള്ളുന്നുണ്ട-
ധികാരത്തിൻ മേലാളർ ....

അഷ്‌റഫ്‌ എസ്സം വരിക്കോളി