എന്റെ വിദ്യാലയം

എന്റെ വിദ്യാലയം
----------------------------
ഈ മണലാരണ്യ മാണെന്റെ വിദ്യാലയം
ഓലമേഞ്ഞ പള്ളിക്കൂടങ്ങൾ പറയാത്ത
ചന്തു മാഷിന്റെ ചൂരൽ മൊഴിയാത്ത
വീട്ടിലില്ലാത്ത നാട്ടിലില്ലാത്ത
സ്നേഹത്തിന്റെ കരുണയുടെ
ഭാഷ ദേശ ജാതിയതിരുകളില്ലാത്ത
ഒരുമയുടെ  പുണ്യം പഠിപ്പിച്ച പാഠശാല

വേദന തളർത്തിയ
എന്റെ മലയാളി പെരുമയിൽ
തൈലം പുരട്ടി തടവി
സാന്ത്വനിപ്പിച്ചവൻ നേപ്പാളി

താങ്ങായ് പിടിച്ചിരുത്തി
വായിൽ അന്നമൂട്ടി തന്നവൻ ബംഗാളി
രണ്ടടി നടക്കാൻ തോള് തന്നതെ-
ന്നമ്മക്ക് പിറക്കാത്ത മലയാളി

ചൊദിച്ചില്ലവരാരും
കടപ്പാടോ നോക്ക് കൂലിയോ  ..

ആയുസ്സിന്റെ നല്ല ചീന്തുകൾ
ഉടപ്പിറപ്പുകൾക്ക് പങ്ക് വെച്ചപ്പോൾ
അവശതയിലവർ കാത്ത് വെച്ചത്
അസംതൃപ്തിയുടെ പ്രാക്കുകൾ മാത്രം

അഷ്‌റഫ്‌ എസ്സം വരിക്കോളി